Kaulinan Budak Leutik

Aya pirang-pirang jenis kaulinan anu biasa diulinkeun ku barudak leutik khususna nu aya di lebur simkuring di Kuningan Jawa Barat anu kalebet ka wewengkon Priangan Wetan tea. Dina ieu tulisan simkuring bade mitutur ngeunaan kaulinan anu biasa dilakonan atawa dialaman utamina ku simkuring waktos masih alit keneh. Tangtosna seueur pisan kaulinan nu sejenna nu teu acan tiasa simkuring pintonkeun dina seratan ieu. Tujuan simkuring nyerat ieu teh teu aya sanes mung hoyong supaya budaya nu kantos dialaman ku simkuring teh teu cuma jadi carita wungkul, tapi saleuwihna tiasa jadi bahan kanggo diajarkeun deui ka barudak jaman ayeuna nu geus teu apal kana kaulinan jaman baheula, nya tujuan nu sanesna deui mah simkuring teh hoyong nginget-nginget deui kaulinan baheula supaya hate simkuring paheut ka budaya jeung lemah cai Sunda.

Kaulinan budak jaman baheulamah salian ti kaulinan anu mintonkeun kagesitan awak teh loba oge nu ngasah kamampuan otak. Jadi salian ti sehat lahir oge tiasa sehat batinna, bungah hate jeung pamikiranana oge bedas tanagana. Jaman baheulamah lamun budak leutik ulin teh katingali tas ulinna, kesangna borobos baseuh, napasna meuni hahehoh, beungeut beureum, buuk lepet jiga beurit meunang manjur. Sacara elmu kasehatan mah pan etateh tos olah raga, jasmani jeung ruhanina gumbira sabab nu ngarana kaulinan jaman baheula mah teu aya budak ulin sorangan, pasti wae aya baturna. Nah nu kitu pan sarua oge ngajarkeun sosialisasi lamun ceuk bahasa kerennamah.

Lamun ditutur dirunutmah da loba pisan atuh manpaat kaulinan jaman baheula teh, ngan hanjakal jaman ayeuna barudak geus teu seneng deui kana permaenan-permaenan nu kararitu. Da jaman baheula mah nu sok maen teh lain budak nu bau cikur wungkul, kadang mah jalma kolot nu geus huisan oge ariluan da resep tea.

Muga-mugamah urang kapayun tiasa ngamumule, ngalastarikeun deui kana kaulinan jaman baheula. Pikeun generasi penerus meh janten generasi tangguh bedas awakna, pinter uteukna, apal kana aturan jeung patuh kana tetengger. Simkuring nampi pisan upami rencang-rencang sadaya anu maos ieu tulisan tiasa masihan saran atawa kritik, komo mun masihan tulisan ngeunaan kaulinan jaman baheulamah ditampi pisan ku simkuring. Sakitu panginten pamuka ti simkuring, mugia mangpaat kanggo sadayana.

Rahayu nu di luhur, Rahayu nu di alam jagat raya, Rahayu nu ngancik na diri.